அவமானப்படுத்துவதென்பது
அவ்வளவு எளிதில் நடந்துவிடுகிறது
அமுதழுது காய்ந்து போன
இறுதிக் கண்ணீரும்
அவளிடமிருந்து
அத்தனை கோபமாய்
வழிந்து கொண்டுதானிருந்தது
நிர்வாணப்படுத்தி அழைத்துப் போகும்
வன்முறையை மீறியதொரு துயரத்தை
பெரும்பான்மையாய்
பெண்களுக்கு அமைத்துக் கொடுப்பதில்
அவனுக்குள்ளெழும் வன்மம்
மானுட நிராகரித்தலின் உச்சம்
மகிழ்வுச் சாம்பலில்
கால் விரல் பதித்துப் பழகிப்போன
ஃபாசிஸத்தின் சித்ரவதைகளை
அனுபவிக்கவா ஏழையின் பிறப்பு
பழங்குடி தொன்மையின் தொடர்ச்சி
சுற்றுலாத் தலங்களாய் மாற்றப்பட்ட
பகுதிகளெங்கும் வாழக்கூடிய
இயற்கையின் இறுதி நம்பிக்கை
காண்பவை யாவற்றையும்
காசாக்க முயற்சிக்கும் சமூகத்தில்
சிக்கித் தவித்துப் போராடும்
எளியவர்களுக்காக
கோபமெழாதவரை
கோழைகளின் தொண்டைக்குள்
ஓடுங்கியே கிடக்கின்றன
உரிமைக்கான குரல்களனைத்தும்
