மீண்டெழும் நம்பிக்கைகள்
ஜ. ஜாஹிர் உசேன், 1 - 15 ஜனவரி 2024

இடிபாடுகளில் சிதறிக்கிடக்கும்

கற்களே

நீங்கள் தான் சாட்சி

நான் படித்த பள்ளிகூடத்தையும்

நான் இருந்த வீட்டையும்

இடித்து விட்டார்கள்

நான் விளையாடிய மைதானம்

என் நண்பர்கள்

என் பொம்மைகள்

என் புத்தகங்கள்

தின்பண்டங்களின் கடை

வெறிச்சோடிக் கிடக்கும் இந்தத் தெருவில்

எதுவும் இல்லாமல்

எப்படி வாழப்போகிறேன் நான்

அரக்கர்கள் உடைத்தது

என் வீட்டை மட்டுமல்ல

வன்நெஞ்சகர்கள்

சுக்கு நூறாக்கியது

என் கட்டிடத்தை மட்டுமல்ல

நேற்று என்னோடு

விளையாடிக்கொண்டிருந்த

என் சகோதரனை

என்னைப் பொழுதெல்லாம்

தூக்கிக் கொஞ்சும் என் தந்தையை

உயிர் சுமந்த என் அன்னையை

அநியாயமாய்க் கொன்றழித்தார்கள்

என் எதிர்காலத்தை

என் குடும்பத்தை

என் வாழ்க்கையை

சிதைத்துவிட்டார்கள்

இந்தக் கட்டிடத்தைப்போல

எங்கள் உலகம்

இருளடைந்துவிட்டது

எங்கள் நாடு

சின்னாபின்னமாகிவிட்டது

வீடிழந்த வீதியில்

எஞ்சியிருப்பது வெறும் கற்கள்

இல்லை இல்லை

இது என் ஆயுதம்

இதைக் கொண்டு

உன் ராணுவத்தை விரட்டுவேன்

உன் பீரங்கிகளைத் துரத்தியடிப்பேன்

இந்தக் கற்களைக் கொண்டு

இனியொரு வீடெழுப்புவேன்

கல்விக் கூடம் உருவாக்குவேன்

ஆக்கிரமித்த என் நிலத்தை

இதிலிருந்து மீட்டெடுப்பேன்