சின்னச் சின்ன ஆசைகளாய்
தபால்கள் தந்த
மகிழ்ச்சிகள் ஆயிரம்
கடிதங்களுக்காகத் தவமாய்
காத்திருந்த நாள்கள்
பள்ளிப் பருவத்தில்
ஆண்டு விடுமுறையில்
பள்ளிக்கூட முடிவுகளுக்காக
தபால்காரரை எதிர்பார்த்து
கால் கடுக்க தெருவில்
நின்ற நாள்கள் அவை
போஸ்ட் கார்டில்
பாஸா ஃபெயிலா தெரிந்து
மகிழ்ந்த நாள்கள்
போஸ்ட்மேனுக்கு சாக்லேட்
வாங்கிக் கொடுத்து
கைகுலுக்கிய நாள்கள்
இடப் பற்றாக்குறையால்
மடிக்கும் இடத்தில் கூட
நுணுக்கி நுணுக்கி
எழுதியது கிழியாமல்
இன்லேண்ட் லெட்டரை
பிரிப்பதே ஒரு கலை
திருமண நாள்கள்
பண்டிகை நாள்கள்
பிறந்த நாள்கள்
வாழ்த்து அட்டைகளால்
காலம் காலமாய்
பத்திரப்படுத்தப்பட்ட
வைப்புப் பெட்டகங்கள்
வெளிநாடு வாழ் நண்பர்களுக்கே
தெரியும் தபாலின் அருமை
தொப்புள் கொடி உறவாய்
தொடர்பு சாதனமாய்
தபால் ஒன்றே
மாதம் மாதம் அனுப்பவும்
மாதம் மாதம் பெறவும்
தாமதமானால் ஏற்படும்
தவிப்பும் ஏக்கமும்
சொல்லி மாளாதவை
கம்பெனி டிரைவருக்காய்
வழிமேல் விழி வைத்து
கவலையோடு காத்திருந்து
கொடுக்கப்படும் கடிதத்தை
பிரித்து படித்து பூரித்து
இறக்கைக் கட்டி பறந்த
நாள்கள் தான் எத்தனை?
பணம் அனுப்பும் ட்ராஃப்டும்
அதை நினைத்து நினைத்து
மனம் மகிழ்ந்து போவதும்
மனைவியின் கடித அன்பும்
மொத்தத்தில் குடும்பம் நடத்தியதே
தபால்களில் தான்
குடும்ப நினைவு வந்தால்
எழுதப்பட்ட தபால்களை
மீண்டும் மீண்டும் படித்து
மனதைத் தேற்றி
அழுது தீர்த்த நாள்கள்
தானாய் தனியாய்
சிரித்துக் குதூகலித்த நாள்கள்
நீங்கா நினைவுகளில்
மயங்கித் திளைத்த நாள்கள்
சுகமான சுமைகளாய்
தபால்களுக்காய் காத்திருந்த
மாயமான நாள்கள்
இந்தத் தலைமுறைக்கு
வாய்க்காத கொடுப்பினை
இன்று மெயில் என்றால் ஈமெயில்
வாழ்த்து என்றால் வாட்ஸ்அப்
டக்கென ட்விட்டர்
இன்ஸ்டண்ட்டாக இன்ஸ்டாக்ராம்
பட்டென பட்டனைத் தட்டி
செய்திப் பரிமாற்றம்
அறிவில் சிறந்து விளங்கி
அறிவியல் வளர்ந்த காலம்
தவமாய்க் கிடக்கும் தபால்கள்
அழிவில் நிற்கும் காலம்
